កំពង់ឆ្នាំង៖ រដ្ឋលេខាធិការក្រសួងយុត្តិធម៌ លោក គឹម សន្តិភាព នាថ្ងៃទី១៥ ខែកុម្ភៈ ឆ្នាំ២០២៤ បានចុះទៅត្រួតពិនិត្យស្ថានភាពជាក់ស្តែងរបស់ទណ្ឌិត នៅពន្ធនាគារខេត្តកំពង់ឆ្នាំងដែលទទួលបានការបន្ធូរបន្ថយទោស។

លោក គឹម សន្តិភាព នឹងវាយតម្លៃបញ្ជីឈ្មោះទណ្ឌិតនៅក្នុងពន្ធនាគារខេត្តកំពង់ឆ្នាំងដែលមានជំងឺរ៉ាំរ៉ៃធ្ងន់ធ្ងរ ចាស់ជរាទ្រុឌទ្រោមខ្លាំង ពិការភាពវង្វេងវង្វាន់ និងវិបល្លាសស្មារតី សម្រាប់ស្នើសុំបន្ធូរបន្ថយទោសដើម្បីអនុវត្តតាមគោលការណ៍មនុស្សធម៌ស្របតាមនីតិវិធីជាធរមាន នៃព្រះរាជាណាចក្រកម្ពុជា។

ទណ្ឌិតដែលមានវ័យចាស់ជរា ជាស្ត្រីមានគភ៌ ឬមានជំងឺរ៉ាំរ៉ៃធ្ងន់ធ្ងរ ពិការភាពវង្វេងវង្វាន់ និងវិបល្លាសស្មារតី ទទួលបានការលើកលែងទោសដោយត្រូវមានលិខិតបញ្ជាក់ពីគ្រូពេទ្យដែលទទួលស្គាល់ដោយក្រសួងមានសមត្ថកិច្ច។

ការបន្ធូរបន្ថយទោសលើទណ្ឌិត អាចធ្វើបានចំនួន ៥ដងក្នុងមួយឆ្នាំ នៅក្នុងទិវាជ័យជម្នះលើរបបប្រល័យពូជសាសន៍ ពិធីបុណ្យចូលឆ្នាំថ្មីប្រពៃណីជាតិ ពិធីបុណ្យវិសាខបូជា ពិធីបុណ្យឯករាជ្យជាតិ និងពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។ ការបន្ធូរបន្ថយទោសក៏អាចធ្វើទៅបានដែរសម្រាប់ពិធីបុណ្យ ឬព្រឹត្តិការណ៍ធំៗរបស់ជាតិ៕